O convenio de colaboración para a protección das aldeas fronte aos incendios forestais que une a Xunta, a empresa pública Seaga e a Federación Galega de Municipios e Provincias (Fegamp) englobará a 17 parroquias e oito concellos da provincia de Lugo.
O conselleiro de Medio Rural, José González, e o director xeral de Defensa do Monte, Tomás Fernández-Couto, reuníronse este martes con varios alcaldes da provincia para explicarlles os pormenores da colaboración. A Xunta prestará apoio técnico aos concellos adheridos nos seus plans municipais de defensa contra incendios e porase en marcha un sistema público de xestión da biomasa nas fajas secundarias, é dicir, aquelas situadas preto dos núcleos de poboación.
No caso da provincia de Lugo seleccionáronse 17 parroquias. No termo municipal de Lugo; Bóveda, Pedreda, Lugo e Muxa; en Sober, Anllo e Doade; no Incio, Vilasouto, Toldaos e Foilebar; en Ribas de Sil, Peites, Ribas de Sil e Rairos; en Ribadeo, Ove; en Pedrafita do Cebreiro, Lousada; en Xermade, Cazás e Lousada; e na Pastoriza será a parroquia da Regueira.
A previsión da Xunta é actuar en 68 parroquias ao longo de toda a comunidade autónoma galega entre os anos 2019 e 2022. Isto suporá que os traballos se estendan por 4.500 hectáreas este ano e 16.000 durante todo o período.