O programa autonómico Aprol Rural permitirá a contratación de 120 desempregados lucenses durante nove meses. A iniciativa conta cun orzamento de 1,5 millóns de euros e crece nun 11% con respecto ao 2018.
Así o avanzou este luns o delegado territorial da Xunta, José Manuel Balseiro, quen explicou que os traballadores desempeñarán as súas funcións en 61 dos 67 municipios da provincia de Lugo, "todos os que o solicitaron", dixo.
A tramitación deste programa xa está en marcha e os concellos poderán comezar a realizar as contratacións no prazo dunha semana. A maioría de empregados realizarán labores de prevención dos incendios forestais, silvicultura, limpeza de montes e xestión da biomasa.
O responsable autonómico explicou ademais que os 17 municipios coa categoría de Concello Emprendedor tiveron prioridade á hora de acceder a estas axudas.
Apuntou tamén que se aumentou "a contía media por traballador, que este ano se sitúa nos 13.176 euros, preto dun 20% máis que no exercicio anterior, atendendo deste xeito tamén a subida establecida para o salario mínimo interprofesional".
POR COMARCAS. En canto á distribución de traballadores por comarcas, en A Mariña haberá 27 novos contratos, aos que se dedicarán 353.000 euros de fondos autonómicos; na zona sur outros 26, con 338.000; en A Terra Chá 20, cunha achega de 264.000 euros; en A Montaña daranse de alta 17 novos desempregados grazas a unha axuda de 226.600; en Lugo 15, con 196.000; en Sarria 8, con 111.000, e en A Ulloa destinarase unha partida de 91.600 euros para contratar a outros sete desempregados.
No conxunto da comunidade galega destínanse en total sete millóns de euros que, segundo avanzou Balseiro, "posibilitarán o emprego de 531 galegos sen traballo en 268 concellos".
"A Consellería de Economía, Emprego e Industria financiará o 100% dos contratos que realicen as entidades locais do rural galego, que terán que estar vinculados á realización de tarefas relacionadas coa xestión do monte e a prevención de incendios nas faixas secundarias", detallou.
