Tras as reclamacións efectuadas por veciños de Becerreá e a polémica orixinada pola retirada da súa pancarta, a Xunta anunciou a mellora da estrada LU-636, que comunica esta localidade co municipio de Sarria, cun investimento de case 830.000 euros.
O director da Axencia Galega de Infraestruturas, Francisco Menéndez, comunicou ao alcalde de Becerreá, Manuel Martínez, un plan de actuación a curto prazo, que a Administración autonómica pretende aprobar nos próximos meses, para arranxar a vía. Menéndez indicou que se trata dun procedemento que permitirá o acondicionamento inmediato da estrada de forma compatible coa súa futura ampliación.
Neste proxecto, que abarca unha distancia de nove quilómetros, a Xunta inclúe un novo asfaltado e a construción de cunetas de seguridade nas zonas de maior amplitude da calzada, xa que a estreiteza da vía provocou numerosos accidentes nos últimos anos.
A Xunta incorpora a este plan de actuación as estradas LU-546 e LU-741, nas que se investirá un orzamento de 1,8 millóns de euros.
Ao redor de corenta persoas iniciaron o domingo as mobilizacións veciñais para reclamar melloras nesta estrada que presenta un "total abandono" desde fai 15 anos ao seu paso polo municipio de Becerreá, segundo os manifestantes. O Concello tamén esixe unha solución para a vía desde o ano 2013.
Os veciños de Becerreá que promoveron a proposta mostráronse escépticos ante as promesas da Xunta, "despois de tantos anos de espera e incumprimentos, aínda que hai supoñer que se manterán na palabra dada".
Os afectados recordaron nos orzamentos da Xunta deste ano programáronse fondos para o viario que vai de Becerreá a Navia, pero non para o que a une a Sarria. Tamén se mostraron molestos pola retirada da pancarta alusiva ás súas demandas por parte de persoal de conservación de estradas, tanto o luns como mércores, cando volveron colocala.
