A conselleira de Medio Ambiente, Territorio e Vivenda, Ángeles Vázquez, anunciou este venres que o seu departamento porá en marcha tres novas plantas públicas de tratamento de bioresiduos para compostaxe nas provincias de Pontevedra, Lugo e Ourense, "ademais da que está xa construída" no complexo de Sogama, en Cerceda (A Coruña).
Así o anunciou na súa comparecencia no Parlamento onde deu conta dos orzamentos cos que o seu gabinete contará o próximo ano, un exercicio con máis “fondos” que o pasado ano, chegando ata
O orzamento estará destinado a cumprir os principais retos de protección “da nosa riqueza natural, a ordenación do territorio e a loita contra o cambio climático”.
Con ese fin, a conselleira anunciou que no ano 2020 iniciaranse os trámites de tres novas plantas públicas para o tratamento de biorresiduos domésticos, ás que se reservan 5 millóns de euros.
Estas tres plantas permitirán dispor dun centro destas características en cada provincia galega, pois se sumarán ao traballo que xa pode desenvolver a instalación de compostaxe de Sogama en Cerceda.
O sector empresarial tamén contará con axudas, 700.000 euros, para mellorar as súas instalacións co fin de que poidan tratar bioresiduos de orixe doméstica.
Así mesmo, Vázquez incidiu na necesidade de avanzar cara a un modelo máis eficiente da xestión dos residuos e convertelos nunha oportunidade, obxectivos cos que a Xunta impulsa a Estratexia de Economía Circular, que se aprobará este mesmo ano, e a Lei de residuos e chans contaminados, que prevé aprobar en 2020.
Neste mesmo ámbito, as contas de 2020 recollen unha partida de 2,6 millóns de euros para mellorar a xestión dos residuos urbanos, aos que se suman 1,5 millóns para a recuperación de espazos naturais degradados por verteduras incontroladas.
O próximo ano, a súa consellería tamén prevé aprobar, en materia de urbanismo, a nova Lei de Ordenación Territorial; no ámbito de patrimonio natural tamén se espera que saia adiante a Lei de Pesca Continental.
Finalmente, a protección paisaxística dará un salto cualitativo o próximo ano desde o punto de vista normativo, coa aprobación do Regulamento da Lei da Paisaxe, da Estratexia da Paisaxe Galega e das Directrices da Paisaxe, en información pública desde o 3 de outubro. Con todo iso, búscase unha xestión “máis responsable”.
En materia de vivenda mobilizaranse 39 millóns de euros para fomentar a rehabilitación de vivendas en Galicia e ademais implantarase a denominada dedución verde no IRPF, que permitirá bonificar o 15% das actuacións que se realicen nos fogares co fin de mellorar a súa eficiencia enerxética.
Bará ademais criticou que o maior programa de Medio Ambiente da Xunta é “desfacer a paisaxe cunha invasión desmedida do eucalipto”.
De igual forma, Antón Sánchez (Grupo Común da Esquerda) avogou por facer unha emenda á totalidade da estratexia da Xunta neste gabinete e pediu a “dimisión” da conselleira.
Sánchez asegurou que en relación co PIB, “hoxe invístese menos” en vivenda pública e no medio ambiente do que se facía en 2009.
De igual modo, desde o PSdeG María Pierres relatou os “compromisos incumpridos” da Xunta en materia de vivenda e paisaxe que pretende tapar con publicidade “e propaganda”.
Pierres referiuse ás “cifras alarmantes” en materia de vivenda e pediulle ao Executivo que traballe para garantir unha vivenda “digna” para todos os galegos.
