Co asasinato deste domingo, a violencia de xénero cobrouse en España a vida dun total de 1.008 mulleres desde o 1 de xaneiro de 2003, cando se empezaron a contabilizar oficialmente.
Só no que vai de ano foron 33 as mulleres asasinadas a mans das súas parellas ou exparellas, dez máis que no mesmo período do ano anterior. Esta triste estatística non deixou de incrementarse ao longo deste mes de xullo, que de momento xa se cobrou sete vidas máis.
A provincia de Lugo tampouco conseguiu librarse desta secuela. Nos últimos dez anos cometéronse na provincia un total de oito crimes deste tipo. Unha lista negra na que tamén se deberían incluír os casos da soberina Estrella Domínguez, que o pasado 8 de marzo morría por mor dos disparos efectuados pola súa parella no domicilio que ambos compartían en Madrid, e o de Lupe Jiménez, unha moza de etnia xitana veciña do barrio de Abella, que en 2014 faleceu apuñalada pola súa parella, José Luis Cortiñas, nunha pista forestal próxima a Santiago.
O ano 2016 foi especialmente tráxico na provincia. No mes de abril conmocionaba o caso de Tatiana Vázquez, que apareceu acoitelada no interior do seu coche no barrio de Sanfiz. O caso volveu estar de actualidade este mes, cando o Tribunal Supremo confirmou a condena de 27 anos de cárcere ao seu asasino, o cidadán nixeriano Ibrahima Ndiaye.
En febreiro daquel mesmo ano, en Becerreá, José Manuel Carballo Neira, O Chamaco, tamén acababa coa vida da súa parella, Ana Gómez Nieto, coa que estaba en proceso de separación. O crime cometeuno en presenza dos fillos da muller, quen por aquel entón estaban a piques de cumprir a maioría de idade.
En abril de 2014 falecía no seu domicilio de Foz Elena Rodríguez Quiroga, de 72 anos, a mans do seu marido, quen tamén acabou quitándose a vida. A muller foi enterrada en Segovia, localidade da que era natural. En xaneiro daquel mesmo ano tamén se cometeu outro crime que conmocionou a toda a provincia. Produciuse en Cervo, cando José Ángel Cuadrado decidía pór fin ás vidas da súa esposa, María José Suárez, de 45 anos, e a súa sogra, Adela López Ramos, de 72. O empresario, que está actualmente en prisión, ensañouse coas dúas mulleres, ás que golpeou unha e outra vez cunha estaca de máis dun metro de longo.
Outro feminicidio produciuse en 2013 nunha vivenda de Camiño Real, cando Gheorge Cornea asestou tres machadazos na cabeza á súa muller, Elena Dumitru. Este crime tamén se cometeu cando no domicilio se atopaban os tres fillos menores de idade da parella. O asasino cumpre condena de 13 anos de prisión.
Esta historia negra da última década arrincou no verán do ano 2010 na capital lucense. Montserrat Labrada Campos, de 43 anos, morría despois de que o seu marido, Juan Carlos Pernas Díaz, a agredira cunha machada no domicilio que ambos compartían no barrio do Sagrado Corazón. O home cumpre condena de 21 anos e 10 meses de cárcere.
