A Vicepresidencia da Deputación impulsa unha nova edición do programa Musiqueando, co que pretende difundir a música tradicional e popular. Destinará 180.000 euros a sufragar integramente o custo de actuacións por toda a provincia, que se desenvolverán do 3 de xullo ao 14 de novembro.
Así o indicou este martes a vicepresidenta provincial, Maite Ferreiro, durante a presentación do Musiqueando deste ano, que tamén contou coa presenza de Mónica Fernández e Patricia Prieto, coordinadora e mestra da Tradescola, respectivamente.
Segundo indicou Ferreiro, desde este mércores e ata o 31 deste mes, os grupos tradicionais, as corais e as bandas -que percibirán entre 750 e 2.500 euros- poden solicitar a súa participación nesta iniciativa, a través dos formularios dispoñibles na cultura.deputacionlugo.gal na convocatoria publicada este martes no BOP. Os concellos e asociacións interesados en programar actuacións tamén terán que solicitalo a través desas vías e nos mesmos prazos.
"Mantemos as novidades que incorporamos o ano pasado, en canto ao financiamento, asumindo ou cento por cento do custo das actuacións para apoiar ou esforzo dos concellos e das asociacións por manter a actividade cultural neste ano no que vemos como a situación epidemiolóxica mellora pero no que temos que afrontar a pegada sanitaria, social e económica do covid 19", explicou a vicepresidenta da Deputación e responsable da área de cultura.
Ferreiro subliñou que "na hora de abordar a recuperación, non podemos deixar de lado a situación das bandas e dos grupos de música tradicional. Detrás deles hai sempre persoas a traballar para facilitar que na súa parroquia, concello ou comarca a xente poida estar en contacto coa música, a través de actividades culturais pero tamén formativas".
Ademais, destacou que, a pesar da incerteza pola situación sanitaria, Vicepresidencia mantivo o ano pasado esta programación e demostrou que "a cultura é un espazo seguro se se atenden as medidas de prevención indicadas polas autoridades sanitarias".
