Detrás de cada accidente de circulación hai unha historia desafortunada e en moitas ocasións o final é tráxico. No que vai de ano, as estradas da provincia de Lugo rexistraron algo máis de 2.500 accidentes de tráfico fóra de centro urbano, o que se traduce nunha media de 250 sinistros ao mes, máis de oito diarios.
Nestes sucesos perderon a vida un total de 18 persoas -dúas mulleres e 16 homes- catro máis que no mesmo período do ano anterior. As estatísticas confirman que os homes sofren máis accidentes que as mulleres, pero botan por terra o tópico de que novos e maiores acaparan os accidentes graves, xa que a maioría dos falecidos este ano en Lugo -en concreto 11- tiñan entre cincuenta e setenta anos. A vítima máis nova contaba con 23 anos, mentres que a de maior idade cumprira os 82.
En canto ao tipo de sinistro, os accidentes mortais rexistrados desde xaneiro na provincia foron moi diversos, aínda que a lista negra encabézana os choques frontais ou frontolaterales entre dous vehículos. De feito, estes accidentes cobráronse este ano a vida de dez persoas. Nun dos casos, o falecido conducía un quad, mentres que noutros tres sucesos estiveron implicados dous camións e un bus.
O groso dos accidentes, tanto graves como leves, rexistráronse en vías secundarias, que resultan menos seguras que as autovías, autoestradas e vías desdobradas
No principio do ano tamén se rexistrou unha colisión por alcance que se saldou cunha persoa falecida. A vítima viaxaba pola A-54 nun coche sen carné -a pesar de que é un vehículo non apto para autovías- e o cuadriciclo foi arroiado por outro turismo.
O segundo tipo de accidente mortal máis frecuente foron as saídas de vía, con catro casos, e tamén perderon a vida sobre o asfalto un ciclista, que sufriu unha caída, e o condutor dunha formigoneira, que envorcou.
SECUNDARIAS. Segundo os datos recompilados pola Xefatura Provincial de Tráfico, dos 18 accidentes mortais contabilizados este ano só tres ocorreron en autovía ou corredor. O primeiro deles rexistrouse o 20 de febreiro na A-54, no municipio de Guntín. Os outros dous tiveron lugar os días 26 de agosto e 8 de outubro no corredor de Sarria, dentro dos termos municipais de Bóveda e O Páramo. O último destes dous accidentes foi quizá o máis tráxico dos rexistrados este ano na provincia, xa que foi o único no que houbo dous falecidos.
Aínda así, o groso dos accidentes, tanto graves como leves, rexistráronse en vías secundarias, que resultan menos seguras que as autovías, autoestradas e vías desdobradas. Os motivos son varios, xa que as interseccións e incorporacións adoitan estar ao mesmo nivel, os trazados son máis antigos e habitualmente están en peores condicións, e tamén hai máis tramos estreitos e de pouca visibilidade. Ademais, son estradas polas que circulan vehículos agrícolas e polas que se cruzan con frecuencia animais salvaxes.
FERIDOS. Os accidentes de tráfico tamén deixaron este ano na provincia un número considerable de lesionados, xa que dos 2.500 sinistros rexistrados na rede viaria de Lugo, algo máis de 400 -o que supón un 16% do total- saldáronse con feridos de diversa consideración.
Así, segundo os datos que manexa a Xefatura Provincial de Tráfico, entre o 1 de xaneiro e o 26 de outubro rexistráronse 421 accidentes con vítimas, nos que resultaron feridas 635 persoas (unha media de 60 ao mes). De todos os afectados, 76 sufriron lesións graves e 559, leves. As cifras revelan ademais que entre xaneiro e outubro deste ano houbo case 200 accidentes máis que no mesmo período de 2017. O dato obriga á reflexión.
