jueves. 20.02.2020 |
El tiempo
jueves. 20.02.2020
El tiempo

O vento roza os 100 km/h e deixa un regueiro de incidencias na provincia

Ondada en Burela. JOSÉ Mª ÁLVEZ
Ondada en Burela. JOSÉ Mª ÁLVEZ
A sensación térmica este luns foi moi inferior á que marcaban os termómetros

O vento e o frío marcaron un luns xélido na provincia de Lugo no que nalgúns municipios, como Portomarín ou Viveiro, rexistraron refachos de case 100 quilómetros por hora. A máxima da comunidade, con todo, alcanzouse na localidade coruñesa de Lousame (113,7 km/h).

Na Mariña soprou con forza especialmente en Viveiro (99,5 km/h), pero tamén en Ribadeo (74,5), Burela (70,9) ou Foz (69,2), mentres que en Portomarín chegouse aos 97. Así o recollen os datos solicitados por Meteogalicia, que reflicten que na capital lucense (72) ou en Abadín (77,8 km/h) os refachos tamén alcanzaron velocidades considerables.

O vento causou varios derrubes de árbores en distintos puntos do litoral. O de maiores consecuencias tivo lugar no Vicedo, que chegou a ocasionar un accidente de tráfico durante a madrugada deste luns. O aparatoso sinistro, no que un turismo chocou cun eucalipto que atravesaba a estrada, saldouse sen feridos, a pesar de causar importantes danos materiais. A vía, a LU-862, permaneceu pechada durante dúas horas.

Un eucalipto derrubado nunha estrada do Vicedo provocou un aparatoso accidente que se saldou sen feridos

FROTA AMARRADA. A frota pesqueira da costa de Lugo tamén se viu afectada polo temporal. Os fortes ventos do nordeste impediron faenar ás lanchas de baixura, aos cerqueiros e mesmo aos barcos de arrastre, que permaneceron amarrados en toda a comarca.

MÁIS INCIDENCIAS. A caída de árbores sobre o tendido eléctrico no Corgo provocou que uns 1.500 veciños deste municipio e do de Castroverde estivesen sen luz durante toda a tarde.

As árbores tamén deixaron incidencias en Terra Chá, A Montaña e A Ulloa. En Vilalba, os derrubes afectaron o tráfico en Lanzós e provocaron que en Oleiros varias casas quedasen sen luz.

Tamén estivo cortada a estrada que une Friol e Parga, onde o vento levou unha barreira do paso a nivel. Na comarca da Montaña o vento rexistrou refachos que superaron os 90 quilómetros por hora. Con todo, as caídas de árbores non afectaron a ningunha vía principal, e os servizos de emerxencia participaron na súa retirada en camiños e accesos secundarios, do mesmo xeito que na comarca da Ulloa, onde tamén tiveron que retirar postes e outros elementos.

A caída de árbores sobre o tendido eléctrico no Corgo deixou sen luz a uns 1.500 veciños deste municipio e do de Castroverde

Na capital lucense, os bombeiros rexistraron preto dunha decena de avisos para recoller cascotes, ferros e tellas. Un dos máis problemáticos tivo lugar na Avenida das Américas, onde varios taboleiros desprendéronse dun edificio.

As temperaturas mínimas rexistráronse en Pedrafita do Cebreiro e en Cervantes, onde descenderon aos -4,3 e -3,6 graos respectivamente, nunha onda de frío que en Galicia deixou a máis baixa en Manzaneda, con -7,5 graos. En calquera caso, a sensación térmica durante a xornada estivo "moi por baixo" do que marcaban os termómetros. Por exemplo, aínda que a mínima en Cervantes foi de -1 graos, a sensación térmica foi de -9 graos. 

Durante a xornada deste martes manterase a alerta amarela no interior da provincia e a laranxa nas zonas costeiras polos fortes ventos do nordeste.

O vento roza os 100 km/h e deixa un regueiro de incidencias na...
Comentarios