A parroquia de Louzarela, en Pedrafita do Cebreiro, acolleu o venres un emotivo acto de homenaxe ao nonaxenario Antonio Río Montero, o último brindeiro da zona da montaña. Máis de 80 persoas, entre amigos, familiares e veciños, asistiron a este evento, no que se descubriu unha escultura de granito feita a imaxe real deste experto do verso.
O monumento, elaborado por un escultor pontevedrés, situouse á beira da casa de Antonio Río, máis coñecido por todos como O Ribeira de Louzarela. O brindeiro mostrouse moi emocionado por este recoñecemento. "Estou moi contento, levo toda a vida dedicándome a isto e amenizando as vodas e festas dá contorna e agradezo moito que se me recoñezan a labor feita", precisou o home. Recordou os seus comezos neste oficio, cando era adolescente. "Tinña 13 ou 14 anos cando empecei. Foi algo casual e innato que ninguén me aprendeu; de feito, na casa eramos varios irmáns e só eu me dediquei a isto", engadiu.
Río lamentou que o oficio se vaia a perder pola falta de substitución xeracional. "Antes era unha profesión que tinga moitos seguidores, era como ter un título dedicarse a isto. Agora vos máis novos xa non queren seguir e é unha pena", indicou o brindeiro, quen cos seus 92 anos nunca deixou o oficio. "Ser brindeiro foi algo que naceu comigo e comigo morrerá", sentenciou.
XORNADA DE CELEBRACIÓN. A xornada, organizada pola asociación Amigos do Filandón, arrincou sobre as 13.00 horas cunha misa solemne na que Antonio Río deleitou aos asistentes cos seus versos. O toque musical puxérono os gaiteiros de Romeor, do Courel. A continuación procedeuse a descubrir a escultura, que foi bendicida polo párroco.
A estatua de Antonio Río contaba dun pedestal cunha inscrición en verso composta por el mesmo sobre a profesión de brindeiro. Para finalizar a homenaxe celebrouse unha comida de confraternidade nunha casa rural da zona que se prolongou ata última hora da tarde. O ágape estivo amenizado pola actuación improvisada de Antonio Río, que deleitou aos asistentes coa súa arte. O alcalde de Pedrafita, José Luís Raposo, tamén asistiu ao acto e agradeceu a Antonio Río o seu labor como brindeiro.
