O presidente da Deputación de Lugo, José Tomé, convocou todas as centrais sindicais con representación na institución provincial a unha reunión para informar os seus representantes dos acordos adoptados polo pleno e pola xunta xeral de Suplusa para a disolución desa entidade. Suplusa veuse ocupando ata agora da construción de residencias da terceira idade e a promoción de solo industrial.
Segundo explicou o goberno provincial nun comunicado, a intención do presidente da Deputación é "informar con total transparencia aos representantes sindicais" de cada "un dos puntos acordados durante ese encontro", que terá continuidade mediante "unha reunión cos deputados designados para exercer como liquidadores de Suplusa". Ademais dos deputados, un por cada partido con representación na corporación provincial, tamén participará nese segundo encontro o asesor xurídico da comisión liquidadora e unha traballadora de Suplusa, nomeada interventora.
Tomé asegurou que así quere garantir "total transparencia e claridade en todo o proceso que desembocará na extinción da sociedade mercantil" e "desvinculalo de calquera manipulación política que puidese darse". Tamén garantiu que non haberá "ningún problema" cos traballadores, porque a institución provincial respectará "todos os seus dereitos".
