A Deputación de Lugo será "a máis barata de Galicia" no que se refire ao custo do goberno e da oposición, segundo dixo este martes o seu presidente, José Tomé, antes de participar no pleno de organización, no que foi aprobada por unanimidade a repartición de recursos entre os grupos políticos para exercer a súa función durante os próximos catro anos.
Segundo informou o propio goberno provincial, mantense o importe dos salarios dos deputados e do propio presidente, dentro dun acordo que, a xuízo de Tomé, é "xusto, equilibrado e contribúe a un bo e eficaz goberno da Deputación", ademais de garantir "que os grupos políticos teñan os recursos e medios suficientes para desenvolver a súa actividade".
Para este mandato, ademais das dedicacións do presidente e a vicepresidenta, aprobáronse outras sete dedicacións exclusivas, dúas ao 50% e outras dúas ao 75% para os deputados que forman parte do goberno provincial, integrado por nacionalistas e socialistas. Ademais, o pleno tamén lle deu luz verde a tres dedicacións exclusivas e unha parcial para o grupo provincial do Partido Popular.
En canto á asignación aos grupos políticos da corporación provincial, tamén se manteñen os importes do pasado mandato, cun compoñente fixo de 4.000 euros ao mes por grupo e outra variable de 1.500 euros por cada membro. Con respecto ao cadro de persoal eventual, contémplanse 25 postos, dos que 8 serán para o grupo Socialista, 3 para o PP e 3 para o BNG, con outros sete no Área de Presidencia e 4 na de Vicepresidencia.
O presidente da Deputación de Lugo, José Tomé, dixo que "o que se trata é de que todos os grupos e o goberno, por suposto, teñan os medios necesarios para levar a cabo a súa función o mellor posible, para prestar o mellor servizo aos cidadáns, que ao final é do que se trata". "Somos a Deputación máis barata de Galicia, tanto no que se refire ao custo do goberno, como da oposición e tamén no que se refire ao salario do presidente", engadiu Tomé en declaracións aos medios de comunicación antes do pleno.
De feito, precisou que mentres en Ourense, "que é a provincia máis pequena de Galicia", o salario do presidente sitúase ao redor dos "73.000 euros", na de Lugo o soldo "queda exactamente como estaba, non tocamos nin un céntimo, e queda en 67.000 euros", o mesmo que "os salarios" dos deputados, que manteñen as mesmas cantidades do pasado mandato.
"Nós pedimos coherencia e proporcionalidade. Entendemos que iso cumpriuse. Imos ter un nivel de esixencia moi importante. Imos pedir moito traballo, tendo en conta a proposta que fixo o goberno, e sempre co mesmo talante, intentando non obstaculizar e achegando de xeito construtivo", dixo a portavoz do grupo provincial do PP, Elena Candia.
"Paréceme importante incidir", insistiu, en que o grupo provincial do PP vai ter "un nivel de esixencia francamente alto" con respecto ao goberno da Deputación, porque a distribución de competencias e de recursos debe traducirse nun "gran compromiso" coa provincia. "A partir de agora a traballar. Temos o mes de agosto, no que está todo máis ou menos paralizado para que o noso grupo provincial se poña ao día. Para asentarnos e estar perfectamente instalados en setembro para tomar decisións", dixo a vicepresidenta da institución, a nacionalista Maite Ferreiro.
