O Centro Integrado de Atención ás Urxencias (CIAE) 112 Galicia rexistrou, entre as nove da mañá e as seis da tarde deste venres, un total de 146 incidencias desencadeadas polos efectos da alerta laranxa decretada por fenómenos costeiros, choiva e vento.
Por provincias, A Coruña foi a máis afectada con 71 contratempos informados; despois, Pontevedra con 57; seguida de Lugo, con 13; e xa para rematar, a provincia de Ourense con cinco. As actuacións urxentes para a prevención de riscos en vías de circulación (31) e árbores e ramas nas estradas (30) foron os incidentes que máis se repetiron.
Na provincia de Lugo, o municipio de Abadín computou tres e Ribadeo dúas.
Na Coruña, destaca Santiago de Compostela con 11 incidencias, Miño con 4 e A Pobra do Caramiñal con 3.
Igualmente, están as 8 incidencias do concello de Vigo, Vilagarcía con 6 e Pontevedra con 5.
Mentres, na provincia de Ourense, nos concellos de San Xoán de Río, Punxín e Ourense cidade, xestionouse unha incidencia en cada un deles.
No que respecta aos sucesos acaecidos polo temporal, ademais dun accidente laboral en Frades (A Coruña), onde faleceu un operario que reparaba un tellado, o 112 Galicia tivo constancia ás 11.10 horas deste venres dunha árbore caída na A-6 á altura de Cambre que interrompía a circulación nos dous carrís, en sentido Lugo.
Nada máis recibir a notificación, o persoal do 112 Galicia informou á Garda Civil de Tráfico, á Policía Local, aos Bombeiros de Arteixo e a Conservación, que levou a cabo a retirada da árbore, posto que a pesar de ser varios os sucesos deste estilo, neste caso entorpecía o tráfico severamente.
Os labores finalizaron ás 11.50 horas.
Tamén, ás 15.45 horas, un home resultou ileso despois de que unha árbore caese sobre o coche no que circulaba en Nigrán. Ocorreu no punto quilométrico tres da PO-332 e foi o propio condutor o que contactou co 112 Galicia para alertar dos feitos.
Enseguida, os xestores do 112 Galicia requiriron a intervención da Garda Civil, de Protección Civil do Val Miñor e da Policía Local.
