A conselleira de Medio Ambiente, Territorio e Vivenda, Ángeles Vázquez
Con este encontro telemático, no que tamén participou o delegado da Xunta en Lugo, Javier Arias, péchase a rolda de contactos que iniciou a Consellería a comezos deste ano coas principais entidades colaboradoras de pesca das catro provincias, unhas reunións que teñen como principal obxectivo solicitar as achegas, inquietudes e opinións do sector.
Neste sentido, a conselleira e os representantes dos pescadores lucenses falaron sobre a convocatoria, prevista para o mes de marzo da liña de axudas da Xunta dirixida a este sector.
Dotada cun orzamento de 80.000 euros, Ángeles Vázquez explicou que se busca apoiar ás entidades relacionadas coa pesca fluvial no desenvolvemento do seu labor, para o que se financiarán tarefas de vixilancia e limpeza nos ríos, ademais de sufragar os custos de campañas de divulgación.
Así mesmo, tamén se referiu á recente aprobación da Lei de Pesca Continental de Galicia, que entrou en vigor o pasado 4 de febreiro. Segundo sinalou, suporá unha "fito clave" para o futuro do sector, xa que nace para garantir o relevo xeracional do colectivo dos pescadores pola vía da formación e da sensibilización aos mozos galegos.
Para cumprir con este fin, insistiu na importancia de contar co apoio das entidades colaboradoras de pesca fluvial, tanto pola propia función que cumpren como polo seu amplo coñecemento sobre os ríos e a situación da actividade en Galicia.