O secretario provincial do PSOE de Lugo, Álvaro Santos, remarcou que para os socialistas lucenses o "obxectivo prioritario" son as eleccións municipais do próximo ano e evitou pronunciarse sobre a convocatoria de primarias para elixir candidato do PSdeG á Presidencia da Xunta.
Este xoves, un día máis tarde da aprobación por parte da executiva nacional do PSdeG do calendario de primarias (que deberá ser agora ratificado por Ferraz), o secretario provincial dos socialistas de Lugo limitouse a comentar que o partido "traballará para que se desenvolvan con normalidade".
"Pero sobre todo imos centrarnos nas municipais, que son as eleccións que están á vista e ten data. O PSOE da provincia de Lugo ten a cabeza posta nas municipais", subliñou.
A comisión executiva nacional galega ratificou o 18 de novembro como data para celebrar as primarias para elixir candidatos en municipios de máis de 20.000 habitantes e ás autonómicas –haberá segunda volta o 25 de novembro no caso de que ningún obteña máis da metade dos votos–.
"Imos traballar para que se desenvolvan con normalidade, no caso de que haxa máis dunha persoa que aspire a ser candidato á Xunta, pero sobre todo imos centrarnos nas municipais", incidiu, para logo apuntar que "sobre procesos autonómicos non corresponde" ás organizacións provinciais "tomar ningunha decisión respecto das decisións tomadas nos órganos do partido".
Deste xeito, Santos asegurou que "sobre todo" o PSOE da provincia de Lugo "non vai perder de vista nin deixar de prestar atención ás municipais".
Na mesma liña expresouse a alcaldesa lucense, Lara Méndez, que apelou a que "o Partido Socialista é un partido municipalista por excelencia" e o que lle ocupa" nestes momentos "son as eleccións municipais".
"Nós traballaremos para sacar o mellor resultado para seguir traballando no noso modelo de cidade. Temos un modelo que estamos a iniciar, e a clave na que traballamos é en sacar os mellores resultados porque van posibilitar mellores resultados de cara aos seguintes comicios electorais, como á Xunta de Galicia", resolvía.
Cuestionada sobre se cre que se presentará máis dun candidato ás primarias para elixir a cabeza de lista nas autonómicas, a rexedora apuntou que iso o terá que valorar quen decida dar un paso adiante".
Finalmente, Lara Méndez tampouco se pronunciou sobre se está de acordo en que coincidan eses dous procesos –primarias para as municipais e autonómicas–, e limitouse a apuntar que "é unha decisión tomada pola dirección do partido". "Non teño nada que dicir", concluíu.
Pola súa banda, o presidente da Deputación da Coruña e secretario provincial do PSOE coruñés, Valentín González Formoso, trasladou o seu "respecto" á decisión do PSdeG. "É un acordo que todos imos respectar e defender", apuntou
Formoso cualificou tamén o momento actual de "intenso" ante a celebración das eleccións municipais en 2019. Por iso, avogou por traballar "con moita ilusión" para consolidar a "socialdemocracia".
Preguntado se ve prematuro que se expoña a elección do candidato socialista á Xunta, reiterou que se trata dunha proposta "referendada" pola Executiva galega. "Hai que respectala como debe de ser", apostilou sen entrar en máis valoracións.
