O comité clínico que asesora á Xunta de Galicia na xestión da pandemia provocada polo covid-19 acordou na súa reunión deste martes manter a Sarria no nivel alto de restricións e a Castroverde no medio.
No resto de Galicia decidiu que Carnota pase ao nivel alto e que os concellos de Cambre, Oia, Barro, Cambados, Poio, Pontevedra, Vilaboa e Vilanova de Arousa suban ao medio.
Os restantes municipios galegos permanecerán no nivel medio baixo. Todas estas medidas entrarán en vigor ás 00:00 horas do próximo sábado 3 de xullo.
O nivel alto de restricións implica que a hostalería só pode dar servizo en terrazas cun aforamento do 50%. O nivel medio permite aforamentos do 30% en interior e do 50% en terrazas, mentres que no medio baixo son do 50% en interior e do 100% en terrazas.
O lecer nocturno, que reabre este xoves, só poderá facelo nos concellos que están no nivel medio-baixo.