Os concellos de Samos e Ribeira de Piquín terán caixeiro automático, un servizo co que agora non contan e que se dotará en base ao convenio entre a Consellería de Facenda e a Federación Galega de Municipios e Provincias (Fegamp) para achegar os servizos bancarios aos galegos que non dispoñen del no seu territorio.
Actualmente hai 45 concellos en Galicia que non teñen caixeiro, 25 dos cales xa o pediron a través deste convenio. Inicialmente haberá un empregado do banco formando ás persoas maiores para que aprendan a usalo e ofrecendo asesoramento fiscal, de modo que despois estas persoas poidan utilizalo de forma autónoma.
PARCELARIAS. O Consello da Xunta aprobou este xoves tres novas concentracións parcelarias en Galicia, dúas delas na provincia de Lugo.
Unha delas realizarase na parroquia de Viladonga, en Castro de Rei, mentres que a outra será en San Xoán de Seoane de Pregación, en Friol. A terceira levará a cabo en Ordes, e entre todas suman 1.780 hectáreas de 891 propietarios diferentes.