O pleno da Deputación viviu este martes unha tediosa sesión, na que a ratificación do regulamento orgánico da institución centrou boa parte dun debate infestado de tecnicismos xurídicos, difícil de seguir para os propios deputados e, desde logo, moi afastado das demandas reais dos lucenses.
A orixe do debate deste martes remóntase ao pleno do pasado 26 de xuño, cando o PP e o deputado non adscrito, Manuel Martínez, fixeron valer a súa maioría para aprobar de forma definitiva un novo regulamento orgánico que daba maiores competencias á corporación -onde ambos suman maioría- e restáballas á xunta de goberno.
Os socialistas alertaron naquel momento da ilegalidade do acordo, xa que non cumpría cos prazos establecidos pola lei para a súa aprobación, o que os levou a presentar un recurso contencioso-administrativo no que se advertía de posibles irregularidades e que foi presentado por seis dos oito deputados socialistas.
O feito de que este martes Campos levara ao pleno a ratificación deste recurso foi cualificado polo deputado popular José Antonio García como unha manobra "de mala fe". Acusou ao presidente provincial de non publicar o novo regulamento para intentar invalidalo e criticou que fose agora cando advertise das irregularidades.
Pablo Rivera defendeu que o regulamento aprobouse mal e que o que este martes se fixo foi advertir das irregularidades, polo que a súa aprobación só podía ser de carácter provisional. Para os populares, a manobra obrigoulles a elixir "entre o malo e o peor", polo que optaron por absterse, mentres que Martínez votou a favor ao aceptar os socialistas unha emenda para modificar á baixa os prazos de presentación de alegacións. Os nacionalistas tamén apoiaron ao goberno.
O equipo de Campos gaña así tempo, xa que mentres non se aprobe o novo regulamento de forma definitiva, rexe o anterior documento que continúa outorgando máis competencias á xunta de goberno.
EDUCACIÓN SOCIAL. A Deputación aprobou unha declaración institucional para regularizar a educación social co desenvolvemento dunha lei tanto a nivel autonómico como a nivel estatal.
