O Salón Gourmets de Madrid premiou catro marcas de queixo elaboradas en Lugo. Airas Moniz (Chantada) e Queixería Prestes (Vilalba) destacaron na categoría de queixos azuis co primeiro e o segundo posto, Carlos Reija Fernández (Castroverde) levou a medalla de prata na de vaca curado e Crisanto (Vilalba) foi terceira en afumados.
O maior premio foi para Airas Moniz e o seu produto Savel, que foi nomeado o mellor queixo azul de toda España. Quedou, ademais, moi preto de ser o campión absoluto, é dicir, o mellor queixo de todos os que participaron nesta prestixiosa xornada gastronómica.
"Só levamos dous anos e xa recibimos dous premios nacionais. Imos coma tiros e esta experiencia serviunos para comprobar que nos estamos convertendo nunha quexería de referencia en España", indicou Xesús Mazaira, un dos tres impulsores do proxecto. Ricardo Gómez e Ana Vázquez traballan tamén nun plan que ten o seu cuartel xeral en Outeiro, na parroquia chantadesa de San Salvador de Asma.
Segundo valorou Mazaira, os técnicos enxalzaron de Savel "un sabor que aínda que persiste na boca durante moito tempo non é nada agresivo, senón suave e elegante". Tamén chamou a atención dos expertos "a calidade do leite, que crea ese toque untuoso e cremoso", engadiu un Xesús Mazaira encantado coa experiencia. "Isto permitiunos establecer contactos con importadores de todo o mundo", concluíu.
Este proxecto naceu hai dous anos co reto de innovar e atopar novos métodos de produción no rural. Os queixos de Airas Moniz non se elaboran con leite de vaca frisoa, a habitual en Galicia, senón de jersey.
Os animais foron traídos de Dinamarca e críanse en réxime de pastoreo, o que significa que pasan a maior parte do día fóra do cortello. Segundo detallou no seu día Ana Vázquez, "se o pasto é abundante poden chegar a estar ata 21 horas no exterior". En caso contrario, as vacas só están no prado ata que cae a noite.
Ese coidado permitiu levar a cabo o primeiro queixo azul -un produto que, doutra banda, é moi pouco típico de Galicia- elaborado con mimo a toda España. O nome de Savel procede de Isabel, a muller á que amaba o trobador medieval Airas Moniz -que residía na zona e dá nome á marca- e que descobre nunha das súas composicións.
