A crise demográfica cargou Galicia —e Lugo— de anos. O envellecemento que transformou a súa pirámide de poboación ata deformarla acúsase en cada actualización das cifras de poboación e convértea tamén na terceira comunidade autónoma máis entrada en anos. Esa é polo menos a súa posición no ranking autonómico da idade media, porque iniciou 2020 con 47,48 anos e só as veciñas Asturias e Castilla y León superan esa marca.
Eses case 47 anos e medio son cinco máis dos que tiña Galicia de media no inicio deste século, e ata quedan curtos para as provincias de Lugo e Ourense, porque a primeira roza os 50 e a segunda xa os supera. No extremo oposto está Pontevedra cos seus 45,88, atendendo ás cifras publicadas polo Instituto Galego de Estatística. As diferenzas dispáranse nos datos municipais.
A distancia entre concellos é tan grande que o que ten a media máis alta e o da menor están separados por máis de 20 anos. Son os que lle leva Lobeira —cos seus case 63— a Ames, con 40,6. ¿E en Lugo? ¿Onde están os extremos na provincia? Están na montaña e na costa: en Navia de Suarna —o único concello lucense que supera os 60, por pouco— e en Burela, cos seus 44.
O mapa que acompaña a esta información permite consultar a idade media de cada municipio, ademais da súa poboación no último padrón publicado, o do inicio de 2020. Non parece casual que ningún dos concellos por enriba dos 60 anos alcance os 2.000 habitantes.
Navia de Suarna | 60,24 anos |
Ourol | 59,34 anos |
Ribeira de Piquín | 59,08 anos |
O Incio | 59,02 anos |
Cervantes | 58,86 anos |
As cifras oficiais tamén constatan que só unha decena de municipios lucenses están por baixo da cincuentena, entre eles a capital. É, de feito, a segunda das sete maiores cidades galegas coa media máis baixa, só maior que a de Pontevedra (44,38).
Burela | 44 anos |
Lugo | 45,37 anos |
Viveiro | 47,03 anos |
Ribadeo | 47,47 anos |
Foz | 47,78 anos |