O PSOE de Monterroso lanzou unha campaña para reivindicar a creación dunha Inspección Técnica de Vehículos no municipio que preste servizo a unha ducia de concellos do centro de Galicia, situados tanto na provincia de Lugo como nas de Pontevedra e A Coruña.
Os socialistas propoñen a vila monterrosina para a localización dese servizo "pola súa centralidade", xa que cinco destes concellos limitan con Monterroso e están nun radio de 5 a 10 quilómetros da localidade. Outros máis afastados atópanse a menos de 25 quilómetros.
Esta ITV prestaría servizo a Chantada, Taboada, Portomarín, Guntín, Palas de Rei, Melide, Toques, Santiso, Agolada, Rodeiro, Antas de Ulla e o propio Monterroso. Esta área conta na actualidade cun total de 33.526 vehículos, dos que 31.598 son turismos e 1.928, maquinaria agrícola e doutro de tipo.
Non hai que esquecer tampouco as boas comunicacións de Monterroso co resto dos municipios. Santiso, Melide e Palas de Rei están comunicadas coa localidade a través da N-547 e a LU-221, mentres que Chantada e Taboada teñen un rápido acceso pola N-540 e a LU-212. Os condutores de Agolada e Antas chegarían pola N-640, o mesmo que os de Guntín e Portomarín.
DESCENTRALIZACIÓN. Na provincia só Lugo, Monforte, Vilalba, Viveiro e Foz teñen servizo de ITV, e os condutores de boa parte dos municipios citados na proposta teñen que trasladarse á capital lucense ou a Lalín. Por esa razón, o PSOE presentará unha moción para que a corporación pida á Consellería de Economía, Industria e Innovación que estude a viabilidade técnica e económica da implantación da ITV. Tamén se demanda o compromiso do Concello para ceder unha parcela no parque empresarial para ese servizo, así como a bonificación do 95% do imposto de construción. O Concello xa efectuou unha petición similar ao departamento autonómico en 2011cando gobernaba Antonio Gato.
Os autores da proposta indican que Monterroso conta cunha ampla rede de talleres mecánicos para vehículos e tractores, así como talleres de electricidade do automóbil para efectuar calquera reparación ou incidencia detectada na ITV.
Os socialistas propoñen a vila monterrosina para a localización dese servizo "pola súa centralidade"
Proximidade
A ULLOA conta cunha ITV móbil para vehículos lixeiros, pero os usuarios quéixanse de non poder elixir a data ou de que a inspección se desprace nunha data distinta á que lles corresponde pasar o control. A proximidade de Monterroso a unha ampla área do centro de Galicia dá solidez á súa demanda, pero outras comarcas como A Montaña ou Sarria tamén teñen razóns para reclamar este servizo.
