Tres novos procesos de reorganización agraria mediante a concentración de parcelas desenvolveranse proximamente nos municipios de Friol, Castro de Rei e Ordes e nun ano haberá outras 23 reestruturacións parcelarias en Galicia.
Así o anunciou este venres o conselleiro do Medio Rural, José González, quen presidiu esta mañá a entrega de 550 títulos de propiedade da concentración parcelaria de Fanoi, no municipio lucense de Abadín.
González dixo que eses próximos decretos súmanse a outras dúas concentracións parcelarias que a Xunta acaba ordenar no municipio de Outeiro de Rei, as primeiras desde 2015.
A Xunta investiu 1,8 millóns de euros na concentración de Fanoi para unha superficie de 650 hectáreas co fin de deixar as 2.500 parcelas inscritas inicialmente en só 550 e en mans de 250 propietarios.
Coa finalización deste proceso, a Xunta reorganizou 3.000 hectáreas de superficie en Abadín, ao completar cinco procesos de reestruturación parcelaria, dos que se beneficiaron 1.200 agricultores.
A Administración galega destinou este ano 12 millóns en preto dun centenar de procesos de reestruturación parcelaria que seguen abertos nestes momentos.