O desenvolvemento do plan de promoción e de protección paisaxística e cultural da Ribeira Sacra enfrontou este mércores a PSOE e PP no pleno da Deputación. Foi un dos asuntos centrais dunha sesión con matices electoralistas e mocións de contido político para denunciar recortes da Xunta, por parte do equipo de goberno, ou débedas do Executivo central con Galicia, por parte do PP.
A portavoz socialista, Pilar García Porto, reclamou que a Xunta fixese público o seu proxecto para a Ribeira Sacra e a convocatoria dunha comisión de concellos da zona e as deputacións de Lugo e Ourense para a súa análise. Porto tachou de brinde "ao sol" os anuncios do Goberno galego, que prometeu un investimento de 34 millóns sen "concretar actuacións".
A deputada do PP Lola Castro replicoulle que o proxecto se desenvolve a través de distintos departamentos autonómicos. Entre as iniciativas en marcha citou a promoción e mantemento do Camiño de Inverno ou a declaración da Ribeira Sacra como área de rehabilitación integral. Instou o goberno provincial a comprometerse co plan coa descrición dos seus proxectos e a consignación dun mínimo de dez millóns para a súa execución.
A Deputación viviu unha sesión con matices electoralistas e mocións de contido político
Porto rexeitou a emenda porque "non podemos destinar boa parte dos nosos orzamentos a un plan que non existe". Do mesmo xeito expresouse o portavoz do BNG, Efrén Castro, quen apuntou que "o normal nun plan destas caracterísicas é facelo público. O que nos piden é que teñamos fe, pero eu na Xunta teño moi pouca".
O BNG desmarcouse do PSOE e votou a favor dunha moción do PP que pedía que se reclamase ao Goberno o abono dos 350 millóns que lle debe a Galicia en concepto de Ive e por incentivos á xestión financeira.
Xosé María Arias (PSOE) defendeu unha iniciativa que esixía á Xunta o fin dos recortes no plan Marco de camiños municipais. A petición aprobouse polo voto de calidade do presidente, José Tomé, como outras propostas, ao repetirse os empates a doce votos pola ausencia da deputada do BNG Mónica Rancaño.
Universidades públicas
O pleno aprobou unha moción do BNG en apoio ás universidades públicas galegas e en contra da creación dunha privada vinculada a Abanca. Agustín Baamonde (PP) acusou aos nacionalistas de "atentar" contra a liberdade de elección de centro educativo.