O portavoz do grupo provincial do PP, Javier Castiñeira, acompañado por varios deputados provinciais, anunciou que presentará no próximo pleno da Deputación dúas mocións para esixir medidas dirixidas a paliar a crise enerxética, "que afecta de maneira moi grave aos concellos, ás empresas e aos autónomos". Castiñeira demandará financiamento complementario ao plan único "para solucionar os serios problemas que teñen os concellos para pagar algúns dos servizos que prestan polo alto custo da enerxía e dos materiais de construción".
O político popular recordou que o PP xa lle reclamou ao goberno provincial en decembro que incrementase o plan único de modo que pasase dos 21,5 a 25 millóns, "a vista da perda do poder adquisitivo que se empezaba a ter e que hoxe reflíctese nunha inflación do 7,6%".
"Viamos que os concellos ían perder poder adquisitivo, como así sucedeu. A realidade dános a razón. Resulta evidente que é necesario un fondo suplementario, con 3,5 millóns de euros, que complementarían o plan único", explicou Castiñeira. O político popular avogou por manter "o criterio de repartición obxectivo do plan único, pero estes fondos irían destinados directamente a paliar a crise enerxética que sofren os concellos".
AXUDAS DIRECTAS. O PP expón noutra moción un plan de axudas directas aos sectores máis afectados pola crise. "Vemos como o sector do transporte, o agrogandeiro e o do mar están a reclamar axudas. Vémolo na costa e na capital da provincia. A Deputación non pode permanecer impasible como o está a facer", indicou Castiñeira. Os populares pedirán ao goberno que preside o socialista José Tomé "que busque recursos para axudar ás empresas e aos autónomos da provincia que o pasan mal polos altos custos da enerxía, como fan outras deputacións".
O PP non admitirá que o goberno provincial "saia con desculpas de mal pagador, como fixo en días pasados a deputada García Porto, preguntándose de onde van sacar os cartos". Se o orzamento da Deputación subiu un 8% "non entendemos por que non soben tamén un 8% como mínimo as axudas a sectores en dificultades", dixo Castiñeira.
Se Tomé e o seu equipo alegan problemas de financiamento, Castiñeira recoméndalles que lle pregunten a Darío Campos, anterior presidente socialista da Deputación, "que cando o PP llo esixiu, buscou fondos para ou plan único e para un plan de estradas con 15 millóns de euros".
