O grupo provincial do Partido Popular na Deputación de Lugo denunciou a publicación de información "nesgada" por parte do goberno socialista a través da súa conta institucional de Facebook.
En concreto, os populares referíronse a unha publicación do pasado 26 de agosto na que se anunciaba un investimento de 340.000 euros para mellorar unha estrada provincial que une os municipios lucenses da Fonsagrada e A Pontenova.
Os populares denunciaron que, "segundo se pode comprobar na Plataforma de Contratación do Sector Público", esta contía correspóndese co arranxo de tres vías provinciais e non co dunha soa.
"A maiores", indican os populares, "en lugar dos 340.000 euros que citan como presuposto base de licitación, finalmente a actuación foi adxudicada por un importe de 231.000 euros".
"Están a anunciar un investimento 109.000 superior á que finalmente se levou a cabo", precisaron desde o grupo popular.
Desde o PP lamentan que "o executivo provincial trate de enganar así aos veciños", máis aínda "cando as cifras son públicas, segundo a normativa vixente".
De feito, tacharon a información vertida nas redes sociais como "publicidade enganosa" e unha "mentira descarada" á xente da provincia.