A política non entende de idades e se non que llo pregunten á socialista Mayra García, que en 2015 se converteu na alcaldesa máis nova de Galicia con só 27 anos e, catro anos despois, acaba de repetir maioría absoluta en Trabada, Di que afrontará coa mesma ilusión un mandato no que volverá ser a rexedora máis nova da provincia lucense, ademais de ser a muller alcaldable máis votada de Galicia.
Con ese afán de axudar aos seus veciños é co que tamén retorna á política Antonio Gato, quen probablemente se converterá o próximo 15 de xuño no alcalde máis veterano de Lugo, con 74 anos. O que fora rexedor socialista de Monterroso entre os anos 1999 e 2015, perdía os comicios hai catro anos a mans da lista independente liderada pola súa excompañeiro de partido Jesús Otero.
Gato renunciaba á súa acta de concelleiro, o que foi interpretado como un abandono da política. Con todo, en 2018 abandonaba o PSOE e comezaba a xestar o seu retorno á area municipal, que este ano materializou coa presentación da candidatura Independentes de Monterroso, coa que acaba de gañar as eleccións por un voto, tras ser aceptado un sufraxio nulo que decidía o inicial empate a 798 votos co PSOE. O edil en disputa foi adxudicado de momento a IxM, xa que hai un recurso pendente, aínda que parece probable que Antonio Gato saia elixido alcalde o próximo 15 de xuño, ao sumar catro concelleiros, por tres o PSOE, tres o PP e un CxG.
O futuro rexedor monterrosino entrou en política en 1973 co PSP que entón lideraba Enrique Tierno Galván, o vello profesor que como el agora quere achegar a súa experiencia no goberno de Monterroso. Durante catro décadas ocupou diferentes cargos públicos, como deputado provincial e tamén autonómico durante as catro primeiras lexislaturas.
A ALCALDESA MÁS MOZA. Esas mesmas catro décadas, en concreto 43 anos, é a idade que separa a Antonio Gato da nova alcaldesa socialista de Trabada, que en 2015 sorprendeu a propios e estraños ao apartar da alcaldía ao veterano rexedor popular José Manuel Yanes Ginzo, quen ocupaba o cargo de forma ininterrompida desde 1991. Mayra García, que era entón a coordinadora comarcal do PSOE, non só debutou con 27 anos como alcaldesa, senón que ademais foi elixida polos seus compañeiros de partido como deputada provincial e, tras a moción de censura que no outono tombou á popular Elena Candia da presidencia, asumiu tarefas de goberno na área de economía, recadación e facenda provincial.
Os seus veciños parecen confiar no traballo desenvolvido por esta moza diplomada en Ciencias Empresariais pola USC, xa que nas eleccións do 26 de maio logrou reforzar a súa maioría ao lograr sete concelleiros, dous máis que en 2015, os mesmos que perdeu o PP, que xa non levaba ao exalcalde como cabeza de lista.
Mayra García asegura que a mocidade non ten por que ser un impedimento para acceder á política, aínda que admite que "parece que a mocidade e as mulleres temos que demostrar máis á hora de gobernar". En todo caso, ela sempre anima a quen senten inquietudes a ter unha participación política activa, porque a pesar de que hai desafección na sociedade cos políticos, considera que son os que teñen que estar preto dos cidadáns para atender as súas demandas.
A alcaldesa de Trabada asegura que no novo mandato terá máis tempo para dedicarlle ao seu Concello, porque non prevé repetir como deputada provincial en San Marcos para centrarse no labor de rexedora, unha decisión persoal que di que xa tomou hai un ano.
