A Consellería de Política Social e o Fluvial de Lugo unen forzas para a promoción do albergue xuvenil Benigno Quiroga de Portomarín, coñecido como o Náutico. As instalacións acollerán en xuño a Copa de España de novas promesas do piragüismo infantil. A titular de Política Social, Fabiola García, recalcou na súa visita ao recinto, que este reúne "todas as comodidades para un encontro destas características". A cita reunirá a máis de mil padeeiros de entre 12 e 14 anos.
O obxectivo do Goberno galego é dar ao albergue "a maior vida útil posible e que beneficie ao maior número de persoas", segundo García. Por esta razón, a Administración autonómica puxo este centro a disposición do Club Fluvial de Lugo para que os seus deportistas poidan acceder e adestrar no encoro de Belesar nos meses nos que non haxa actividades, como sucede cos campamentos de verán. A conselleira anunciou que este acordo se renovará un ano máis.
Fabiola García estivo acompañada na súa visita a Portomarín polo delegado da Xunta en Lugo, Javier Arias; o alcalde, Juan Serrano, e o presidente do Club Fluvial, Tito Valledor. O responsable da entidade lucense destacou a importancia de contar "cuns equipamentos tan excepcionais como os de Portomarín, que nos permiten organizar probas desta magnitude, coa repercusión que iso leva para a contorna". A Copa de España infantil é a única competición nacional que se fará fóra das bases do circuíto permanente da Federación Española de Piragüismo en Sevilla, Asturias e Pontevedra.
Valledor agradeceu o labor de Juan Serrano, "un dos maiores artífices" do acordo subscrito entre o Fluvial e Política Social.
