Cinco axentes de Portugal e Francia reforzarán o Plan de Seguridade Xacobeo e colaborarán coa Garda Civil na asistencia aos peregrinos franceses e lusos ao seu paso pola provincia de camiño a Santiago. A subdelegada do Goberno, en Lugo, Isabel Rodríguez, deu o mércores a benvida aos policías desprazados para colaborar no mencionado programa.
"Xa están comisionados na provincia, para axudar á Garda Civil a dar a mellor atención posible ás persoas doutros países que peregrinen a Santiago, os tres primeiros axentes das xendarmerías de Francia e Portugal", confirmou Rodríguez.
A subdelegada do Goberno explicou que a presenza destes cinco policías —os tres restantes incorporaranse o próximo mes— prodúcese nas datas nas que se rexistra unha maior afluencia de peregrinos, "moitos deles procedentes destes dous países".
Isabel Rodríguez destacou a importancia da cooperación entre as forzas de seguridade que permite ofrecer unha mellor atención aos peregrinos de nacionalidades francesa e portuguesa e agradeceu ás xendarmerías de Francia e Portugal "a colaboración que nos prestan tamén este verán".
En total serán cinco os axentes desprazados, con base en Sarria e Portomarín, que reforzarán a Garda Civil durante o período estival. O Plan de Seguridade Xacobeo 2019 conta coa participación, na provincia de Lugo, de dous gardas da Xendarmería Portuguesa GNR que traballarán en dúas quendas. Pola súa banda, a Xendarmería de Francia GNF enviou primeiro un sarxento e na segunda quincena do próximo mes enviará dous xinetes.
APP DE SEGURIDADE. A pasada semana, a Garda Civil anunciou un reforzo da seguridade dos usuarios do Camiño Francés cunha aplicación móbil que permite realizar un seguimento diario dos peregrinos para ofrecer unha atención rápida en caso de incidencia.
O novo sistema está vinculado á app Alertcops, posta en marcha no 2014 polo Ministerio do Interior.
