A orde do Goberno para obrigar ás grandes operadoras a levar antes do 1 de xaneiro de 2020 aos municipios españois de menos de 5.000 habitantes o acceso a internet a unha velocidade mínima de 30 megabits (Mbps), poderá beneficiar a un total de 52 concellos lucenses que, a día de hoxe, deben conformarse cunha cobertura inferior.
Segundo datos correspondentes ao 30 de xuño de 2017 -os últimos dispoñibles na páxina web do Ministerio de Industria, Comercio e Turismo- o 44,7% da poboación lucense ten unha conexión a internet a unha velocidade inferior aos 30 Mbps, unha porcentaxe que a nivel nacional redúcese ata o 19%.
Dedúcese, polo tanto, que a provincia lucense debería ser unha das máis beneficiadas con este plan, que ten por obxectivo que o 90% dos cidadáns dos municipios españois de menos de 5.000 habitantes teñan en 2020 conexión de banda ancha de 30 Mbps.
Segundo a orde publicada no Boletín Oficial do Estado (Boe) do pasado xoves, serán as grandes operadoras (Telefónica, Vodafone e Orange) as que deberán custear sen axudas públicas o plan para estender a banda ancha aos pequenos municipios.
En todo caso, este plan de extensión non é novo xa que data dunha obrigación que se incluíu na poxa de frecuencias de 800 megahertzios (Mhz) de 4G en 2011. O feito de que as operadoras non dispuxesen desas frecuencias ata 2015 e posteriores dilacións do Goberno no que era tamén coñecido como Plan 800 provocou que esta obrigación non se fixese oficial ata este momento.
Mellorar a velocidade de acceso a internet é unha das grandes demandas dun elevado número de lucenses. Dos 67 concellos da provincia, só Burela, Chantada, Foz, Lugo, Mondoñedo, Monforte, Rábade, Ribadeo, Sarria, Vilalba, Viveiro e Xove teñen velocidade de acceso superior a 30 Mbps.
Pola contra, a velocidade de conexión a internet sitúase por baixo dos 10 Mbps en 25 municipios lucenses. Son concretamente, os de Abadín, Alfoz, Baleira, Barreiros, Becerreá, Begonte, Carballedo, Castro de Rei, Cervantes, O Corgo, Friol, O Incio, Monterroso, Negueira de Muñiz, Ourol, Outeiro de Rei, Pantón, O Páramo, Pol, Ribas de Sil, Ribeira de Piquín, Samos, O Saviñao, Sober e Triacastela.
