A robótica educativa será a protagonista da duodécima edición do Seminario de Avaliación de Materiais Didácticos, que terá lugar en Palas de Rei o próximo 10 de abril.
Esta actividade vai dirixida a estudantes de primaria, profesorado, familias e persoas interesadas en iniciarse no tema a tratar. No entanto, hai un límite de 30 prazas e terán prioridade de inscrición os nenos de Palas de Rei. Os interesados poden comunicarse cos organizadores a través do correo [email protected].
O obxectivo deste seminario é ofrecer un espazo de encontro para favorecer o análise e utilización crítica dos robots con fins educativos, tanto na escola coma nos fogares.
O acto de presentación do seminario estivo presidido polo alcalde de Palas de Rei, Pablo Taboada, e nel participaron o director do colexio palense, Xullo Alberto Árias; Rocío García, do Centro Pedagóxico Aloumiño, ademais de integrantes do equipo técnico que organiza esta actividade.
