A Orde do Camiño de Santiago arrincará este mes de outubro un proxecto para promocionar e dar a coñecer a ruta xacobea a través de cinco xornadas multidisciplinares que terán lugar en distintos municipios galegos, unha iniciativa amparada no programa O teu Xacobeo. Dúas delas celebraranse na provincia de Lugo, en Mondoñedo e Palas de Rei.
Cada unha das xornadas que conforman Coñece os Camiños constará dun panel de conferencias sobre o Camiño de Santiago e o Xacobeo, unha actuación musical, degustación de produtos típicos de cada comarca e unha visita guiada de ámbito cultural e turístico en cada municipio.
Nas conferencias trataranse temas de sustentabilidade, itinerarios culturais, peregrinacións e desenvolvemento de cada un dos Camiños e estarán dedicadas a distintas vías.
En concreto, en Mondoñedo porase en valor o Camiño do Norte; en San Cristovo de Cea, a Vía da Prata-Camiño Mozárabe; en Tui, o Camiño Portugués; en Palas de Rei, o Camiño Francés, e en Carballeda de Valdeorras, o Camiño de Inverno.
