A Asociación Provincial de Empresarios de Hostalería de Lugo (APEHL) informou de que os datos de ocupación hostaleira da Ponte da Constitución fixeron virar "a liña ascendente de negocio" dos últimos anos, dado que caeu un 10% en relación coas cifras de visitantes rexistradas o ano pasado.
Segundo a APEHL, a ocupación hostaleira alcanzou un 70,76% durante a Ponte da Constitución nos establecementos da provincia de Lugo, cando a media en 2017 chegou ao 80%.
En canto ás causas que poderían explicar esa baixada, a asociación que agrupa aos hostaleiros lucenses afirma que "os festivos do ano pasado foron máis favorables para viaxar".
Con respecto ás zonas da provincia con máis tirón, o centro da provincia -a capital lucense- foi a máis visitada, cun 71,64% de ocupación; mentres que a Terra Chá logrou un 71,43% e A Mariña e Ribeira Sacra roldaron o 70%.
