A percepción dos veciños que residen nas inmediacións das obras da autovía A-54 (de Lugo a Santiago) é que os traballos avanzan a un ritmo moito máis lento do desexado. O anterior ministro de Fomento, o popular Íñigo de la Serna, dixo en marzo, cando visitou Arzúa, que a infraestrutura estaría totalmente operativa na primavera de 2022. Desde entón, os traballos seguen sen coller ritmo, mentres que o ministerio evita concretar datas para a apertura dos tres tramos que restan por acabar. Limítase a sinalar que as obras avanzan "con normalidade", pero de prazos concretos, nada.
A situación xa non sorprende nin aos veciños nin aos potenciais usuarios da autovía, afeitos como están a que o proxecto, que naceu en 1999, acumule lustros de atraso.
Dos tres tramos que están en obras e que completarán a autovía, o máis avanzado é o que transcorre de Lavacolla a Arzúa.
Segundo Fomento, a súa entrada en funcionamento "suporá un grande avance" para as comunicacións entre Lugo e Santiago "pola súa importante lonxitude, 18 quilómetros".
As previsións apuntan a que debería abrirse ao tráfico a mediados do próximo ano e, aínda que os traballos son moi visibles na zona de Lavacolla -onde xa se traballa na unión do novo tramo co que vai a Santiago de Compostela, que está operativo desde 1999-, o certo é que na parte de Arzúa a obra está moito máis verde. Tanto, que se dubida que nunha primeira fase o traxecto se poida abrir na súa totalidade.
"O último que nos dixeron é que se abrirá unha primeira sección desde Lavacolla á parroquia de Burres, quedando para máis adiante os últimos seis quilómetros que separan este punto da rotonda que dará acceso a Arzúa", sinalan desde a factoría de pensos Irmáns Penas, cuxas instalacións se verán en parte afectadas pola construción do tramo entre Arzúa e Melide.
Foi o pasado mes de marzo cando Íñigo de la Serna, acompañado polo presidente da Xunta, inaugurou as obras deste tramo. Foi o último en licitarse e será o último que entre en funcionamento. Pero cando xa transcorreron case nove meses daquel momento, as máquinas nese punto aínda non se puxeron en marcha.
"Hai uns días puxeron unhas balizas que marcan por onde pasará o trazado da autovía e ata agora aínda non vimos traballar ningunha máquina", din desde Irmáns Penas. O orzamento deste tramo supera os 88,5 millóns de euros e, a pesar da perceptible inactividade, desde Fomento aseguran que "todo avanza ao ritmo inicialmente previsto". De feito, concretan que os traballos realizados ata agora foron previos de control e seguimento arqueolóxico e movemento de terras.
MELIDE-PALAS. O ritmo de execución das obras do tramo entre Melide e Palas, que se iniciaron en xuño de 2017 e previsiblemente finalizarán a mediados de 2021, tamén xera controversia entre os que as viven dunha forma próxima.
O propietario dunha granxa avícola situada en San Cosme, xusto á beira de onde se constrúe o enlace Melide Sur, explica que "neste punto moito movemento non se ve. Algún día cinco ou seis obreiros ou algún camión, pero pouco máis".
Tamén se mostra escéptico co ritmo das obras o traballador dun serradoiro próximo. Explica que o groso do traballo concéntrase estes días no núcleo de Reboredo, xa no municipio de Santiso, onde se constrúe o viaduto que debe salvar o río Furelos. "Camións, guindastres e obreiros hai e o certo é que veñen traballar todos os días", afirma. "Eu penso que se hai cartos traballan pero segundo están as cousas, quizá ata o 2030 non a dean rematado", vaticina.
De momento, Fomento tamén mantén que neste tramo os traballos van "segundo o previsto" e que ademais da construción do viaduto, execútanse outros traballos correspondentes "ao movemento de terras e drenaxe transversal".
