Negueira de Muñiz reivindicou este sábado o peso histórico do sector vinícola coa celebración da I Xornada da Vendima. Esta cita, promovida pola Asociación polo Desenvolvemento de Negueira de Muñiz (ADN), levou a decenas de persoas á aldea de Sanformar, deshabitada na actualidade, onde se descubriron recentemente máis dunha vintena de adegas centenarias. A visita a esas construcións —abandonadas desde hai décadas e que estaban ocultas entre a maleza— foi, precisamente, o acto central dunha xornada na que, ademais, distintos expertos resaltaron o valor etnográfico desta aldea, situada xunto ao encoro de Grandas.
Esta primeira Xornada da Vendima arrincou sobre as 10.30 horas coa apertura dos postos dun pequeno mercado. Ofrecéronse artigos de artesanía, de alimentación e viño elaborado por dous adegueiros do municipio.
Tras unha actuación de Antaruxas e Sorteiros, os asistentes visitaron as antigas adegas, accesibles grazas aos traballos de roza realizados nos días previos por membros de ADN e operarios do Concello. Esta cita incluíu tamén unha exhibición de pisado de uva.
ACHADO. "Sabiamos que en Sanformar había algunha adega, pero non esperabamos que fosen tantas", explicaba este sábado o presidente de ADN, Luis Río, sobre ese recente achado que desembocou na celebración deste festexo. "Pertencían a xente da alta montaña, que viña ao val para facer o viño", detallou. Destacou que un dos donos desas construcións ofreceuse a exercer onte de guía nese percorrido entre adegas. Tras felicitarse da boa acollida que tivo a festa na súa estrea, Luis Río adiantou que haberá unha segunda edición o próximo ano. Ademais, indicou que o colectivo que preside tratará de conseguir apoios para continuar coa recuperación deste conxunto etnográfico.
