As mulleres cobran en axudas da PAC case a metade que os homes

Somos máis, pero cobramos menos. A situación das mulleres no medio rural non é diferente á do resto dos sectores laborais. En Galicia, houbo 15.545 mulleres, titulares de explotacións agrogandeiras, que percibiron axudas directas europeas da PAC (Política Agraria Común) en 2017 fronte a só 11.812 homes. Con todo, eles —que eran minoría— percibiron máis diñeiro ca elas —maioría—. O último informe económico elaborado pola Federación de Asociacións de Mulleres Rurais de Galicia, Fademur, expón as cifras que delatan esta fenda de xénero no campo: as 15.545 mulleres, titulares de explotacións en Galicia, cobraron 3.292 euros cada unha de media en axudas directas da PAC en cambio os 11.812 homes percibiron 5.403 euros de media cada un. En total, elas cobraron un 39,07 por cento menos por cabeza que eles.

"Nestes datos obsérvase como hai unha fenda salarial de xénero que afecta ás mulleres do rural galego, que cobraron, de media, 2.111 euros menos por cabeza cós homes. Quizais isto se deba a que as mulleres adoitan ser titulares de explotacións máis pequenas ou tamén que moitas delas non son titulares porque non hai en Galicia unha Lei de Titularidade Compartida que garanta unha igualdade entre mulleres e homes non rural e que, polo tanto, haxa unha perspectiva de xénero na concesión das axudas da PAC, tanto as directas como as de desenvolvemento rural", expuxo Rosa Arcos Caamaño, presidenta galega de Fademur, que deu este mércores unha rolda de prensa na sede lucense do sindicato Unións Agrarias.

Os datos e porcentaxes das axudas da PAC para o desenvolvemento rural concedidas en Galicia seguen a mesma tónica que as directas. Tamén, neste caso, as mulleres titulares de explotacións cobraron, por cabeza e como media, menos diñeiro que os homes (2.835 euros fronte a 3.781, un 25,01 por cento menos). Con todo, si que, nesta categoría, foron máis os homes a quen se lles concederon as axudas que as mulleres.

"Houbo 6.989 beneficiarios homes das axudas da PAC para o desenvolvemento rural fronte a só 6.471 beneficiarias mulleres", indicou Rosa Arcos.

A presidenta de Fademur denunciou que se está producindo unha "masculinización" no rural galego, que sofre ademais as consecuencias do despoboamento e o envellecemento. Rosa Arcos expuxo tamén que o medio rural en Galicia abarca o 87 por cento do territorio e, con todo, neste territorio só viven dous de cada dez galegos. Para loitar contra esta situación, Fademur puxo en marcha unha lanzadeira de emprendemento rural, Ruraltivity, que pretende favorecer a incorporación da muller ao mundo empresarial para favorecer o asentamento da poboación e, á vez, dinamizar as aldeas e frear a súa desaparición.