Cinco motoristas resultaron feridos na tarde deste venres, en dous accidentes que se rexistraron de forma case simultánea en estradas da provincia de Lugo, nos municipios de Sarria e Sober.
O primeiro dos sinistros tivo lugar no punto quilométrico 46,200 da LU-633. Nel dous mozos resultaron feridos ao saírse da vía a motocicleta na que viaxaban, no termo municipal de Sarria. O accidente produciuse sobre as 19.15 horas, cando circulaban en dirección Sarria e, nun tramo curvo na zona de Fafián, saíronse da calzada pola marxe dereita.
Tanto o condutor como a muller que viaxaba como acompañante foron trasladados ao Hula para ser atendidos das feridas sufridas.
Ao lugar do contratempo acudiron tanto a Policía Local como a Garda Civil de Tráfico.
A esa mesma hora aproximadamente, o 112 Galicia recibía a chamada dun particular alertando doutro accidente de moto no quilómetro 11 da LU-903, no municipio de Sober. Nesta ocasión víronse involucradas no accidente dúas motocicletas que impactaron entre si, co balance de tres persoas feridas.
Aos dous sinistros que se produciron onte na provincia e nos que se viron involucradas motocicletas, hai que sumar o ferido do accidente do venres en O Vicedo, ao chocar co seu vehículo de fronte contra un turismo.
A Dirección Xeral de Tráfico (DXT) detectou tras o confinamento polo coronavirus e coa chegada do bo tempo un incremento de accidentes de motocicleta, polo que pide aos usuarios deste tipo de vehículos prudencia.
