martes. 11.08.2020 |
El tiempo
martes. 11.08.2020
El tiempo

Monterroso queda sen clube de fútbol sala feminino

Equipo do Monterroso que foi campión de España infantil en 2002. EP
Equipo do Monterroso que foi campión de España infantil en 2002. EP
A suspensión de subvencións cobra a súa primeira vítima
 

O equipo de fútbol sala feminino de Monterroso anunciou a súa disolución por razóns de inviabilidad económica e pola falta dunhas instalacións adecuadas para competir en Primeira Autonómica. O proxecto deportivo estaba a expensas do cobro dunha subvención de 3.000 euros por parte do Concello, "que era fundamental para o mantemento do clube", segundo explica a directiva Marta Gontá, que tamén é xogadora. A desaparición desta entidade é unha das consecuencias derivadas da suspensión temporal das axudas a asociacións e clubs deportivos ao non aprobarse os orzamentos municipais, nin fixarse partidas específicas para outorgalas.

O atraso da apertura do pavillón pesou na decisión

A entidade conta con escasos recursos, o que obrigaba ás súas once xogadoras a achegar 120 euros ao ano e pagar a roupa e os desprazamentos para poder competir. Ademais, o seu adestrador renunciou a cobrar os últimos meses.

A falta dunhas instalacións adecuadas non só en Monterroso, senón noutros municipios ulloanos, foi outra das razóns para deixar este proxecto. A Cúpula non reúne as condicións esixidas pola federación e o novo pavillón segue sen usarse varios anos depois da súa construción pola falta de acordo entre o Concello e a Deputación para recibir as obras.

Desprazamento. O equipo xogou varios partidos en Agolada
A precariedade da Cúpula fixo que o clube pagase varias multas. Outras veces chegou a acordos cos seus rivais para xogar no pavillón de Agolada, a pesar de estar noutra provincia e a máis de dez quilómetros, algo que prohibe o regulamento. Este é o fin dunha entidade cuxo equipo infantil se proclamou campión de España en 2002 e quedou cuarto en 2003. 

Falcatrueiros. A asociación Falcatrueiros mantén a súa actividade e os pagos ao día, a pesar de que tamén está á espera da axuda municipal.

Monterroso queda sen clube de fútbol sala feminino
comentarios