O alcalde de Becerreá, deputado non adscrito e fundador do partido Galicia Sempre, Manuel Martínez, dirá este luns adeus a vinte anos de traxectoria política na Deputación de Lugo -nunha sesión extraordinaria que se celebra a partir das 14.00 horas-, tras un último mandato convulso, coa súa saída do grupo socialista, despois de ser designado no seu momento para presidir a institución.
En declaracións a Efe, asegurou que deixa a institución provincial cun sentimento de "satisfacción", porque "en todo momento" cumpriu "coas obrigacións dun deputado provincial, máis aló de que no último mandato se produciran "circunstancias extraordinarias e excepcionais" que derivaron no seu divorcio co Partido Socialista.
"Fíxoseme a cama por parte dos meus compañeiros dun xeito impresentable, polo que houbo momentos desagradables e dolorosos. Aínda así non me arrepinto de nada", engadiu Martínez. "Marcho coa cabeza moi alta despois de vinte anos de traballo, aínda que me gustaría que esta última etapa fora doutro xeito", lamentou.
Martínez, que foi elixido polos militantes socialistas ao principio do anterior mandato para ser presidente da Deputación, non puido tomar posesión do cargo polo veto do BNG por mor da súa imputación nunha causa que posteriormente foi arquivada, polo que votou en por si no pleno de constitución da corporación provincial e facilitou a chegada ao poder de Elena Candia, do Partido Popular.
Posteriormente, chegou a un acordo co grupo socialista e regresou á disciplina do PSdeG para asinar unha moción de censura que puxo fin ao mandato de Candia, tras catro meses como presidenta, e facilitou a formación dun novo goberno provincial, no que Martínez quedou como vicepresidente e responsable de Vías e Obras.
Coas relacións entre o propio Martínez e os seus compañeiros moi deterioradas, acabou abandonando o PSdeG por segunda vez no transcurso do pasado mandato e quedou na corporación provincial como deputado non adscrito.
