O xerente da área sanitaria de Lugo, A Mariña e Monforte de Lemos, Ramón Ares, confirmou que o 36% da poboación da provincia completou xa a pauta de vacinación contra a covid-19. Neste momento, explicou, recibiron xa a pauta completa 117.974 persoas na provincia de Lugo. Máis da metade da poboación de Lugo, concretamente 182.307 persoas, que equivalen ao 55,2% dos residentes na área sanitaria, recibiron polo menos unha dose da vacina.
Ares afirmou que a campaña de vacinación de está a desenvolver con normalidade, ao ritmo que marca a chegada de doses das diferentes farmacéuticas.
En total, das máis de 23.000 persoas citadas para recibir a vacina esta semana en Lugo, 14.438 persoas serán inmunizadas no Hula, outras 5.550 na Mariña e 3.104 en Monforte.
En canto ao grupo de idade de 40 a 49 anos, 13.350 persoas recibirán a primeira dose da vacina esta semana -única, no caso daquelas que sexan inmunizadas co preparado de Janssen-.
O sábado estará dedicado nos hospitais de Lugo á aplicación de segundas doses de AstraZeneca e foron citadas 1.918 persoas.
