O manifesto que sete asociacións da Ulloa presentaron nos concellos de Monterroso, Palas de Rei e Antas de Ulla como rexeitamento á batida de raposo que ten previsto celebrarse mañá en parte deste territorio non caeu en saco roto. Este xoves, máis de 140 asociacións de toda España e de todos os ámbitos –culturais, ambientais, ecoloxistas, colectivos cidadáns e grupos políticos– subscribiran este documento co que se pretende frear os campionatos de raposo que se celebran en Galicia e, concretamente, a proba prevista para este sábado en tecores de Portomarín, Guntín, Paradela e Monterroso.
Estas firmas agregáronse ao novo manifesto que se volveu a entregar o xoves en todos estes concellos, co obxectivo de conseguir que as diferentes corporacións mostren o seu rexeitamento a este tipo de competicións.
Estes colectivos tamén piden á Xunta que non conceda ningún permiso máis para a "realización de estas matanzas no seu territorio no futuro", segundo explican nun comunicado de prensa.
Os subscritores do documento argumentan a súa oposición a este tipo de cacerías esgrimindo estudos científicos que explican "o crucial papel do raposo" como depredador de micromamíferos que poden chegar a crear superpoblaciones daniñas na agricultura, como rata-topo ou o topillo.
Tamén defenden ao raposo como depredador de invertebrados e polo seu papel carroñero, o que, segundo eles, axuda a "sanear" o monte de animais mortos que poidan transmitir enfermidades. A todos estes beneficios que achega este mamífero, os seus defensores engaden a súa importante incidencia como "dispersor de sementes", á vez que recordan que só o 5% da súa dieta está composta de pequenas aves como galiñas, perdices ou paspallás, polo que os ataques a currais "só ocorren de forma moi ocasional".
Todos os colectivos que defenden a suspensión definitiva deste tipo de probas estiman, ademais, que nas últimas seis tempadas de caza, matáronse en Galicia uns 75.000 exemplares de raposo e que, en moitos casos, trátanse de femias preñadas xa que nesta época do ano esta especie xa pasou polo seu período de celo.
XUNTA. A Xunta de Galicia aínda resolverá este venres se autoriza a batida prevista para este sábado nos tecores de Portomarín, Paradela, Guntín e Monterroso. Ao parecer, desde o Goberno autonómico instouse á organización a ampliar parte da documentación presentada.
A última batida deste tipo celebrouse o pasado 19 de xaneiro en Láncara e Triacastela, entre as protestas de animalistas.
