A Deputación de Lugo aprobou este venres en xunta de goberno as bases para o proceso de selección dos 188 novos postos de traballo que o organismo provincial xera en empresas e colectivos da provincia, a través do programa de emprego Ben Empregado 4.
O presidente da Deputación de Lugo, Darío Campos, precisou que o prazo para presentar as solicitudes estará aberto desde o vindeiro luns 5 ata o 19 de febreiro a través da axencia de colocación de emprego da Deputación ou nos rexistros provinciais.
Ademais, incidiu en que o goberno socialista da Deputación está "a axudar a reducir o paro sen ter competencias polo emprego activo na provincia" e aproveitou para mandar unha mensaxe ao Goberno central de Mariano Rajoy, ao que reprocha que "presume de crecemento de postos de traballo pero estes son temporais e precarios", denuncia.
RESIDENCIA DA PONTENOVA. Doutra banda, o tamén alcalde da Pontenova informou da aprobación do convenio para dotar a este municipio lucense dunha residencia para maiores, enmarcada na rede deste servizo e centros de día públicos que impulsa o organismo provincial.
A Deputación destina 1,2 millóns de euros a esta infraestrutura e o Concello da Pontenova outros 200.000 euros. O edificio albergará 50 prazas, 30 de residencia e 20 de centro de día. É un servizo "moi necesario", destacou o presidente. "Porque temos moita xente en residencias fóra do municipio", abundou.