Lugo é a provincia con menos falecidos en España na primeira vaga do coronavirus, con 31 mortes identificadas e 11 máis sospeitosas de covid, segundo os datos publicados esta semana polo Instituto Nacional de Estadística (Ine), e que supoñen 15 máis dos rexistrados oficialmente pola Consellería de Sanidade.
Deste xeito, Lugo é a provincia que conta con menos mortes por esta enfermidade ata maio, con base nos certificados médicos de defunción que emprega o Ine, seguida de Huelva —con 44 falecementos e 13 máis sospeitosos—.
Non sucede o mesmo nesta segunda vaga, na que o coronavirus golpeou con máis forza na provincia lucense. Desde xuño, faleceron 113 persoas, ao producirse gromos cun elevado número de afectados en residencias de anciáns.
Así, o 80 por cento das persoas que perderon a vida polo covid en Lugo tiñan máis de 80 anos. Non se rexistrou na provincia ningún óbito de pacientes con menos de cincuenta.
Lugo empezou a segunda vaga un pouco antes que o resto de Galicia e España co gromo que se produciu na Mariña en xullo.
O 19 de novembro foi a xornada na que se detectaron máis infectados a través de PCR, con 178, pero o segundo día con máis casos correspóndese cun da primeira vaga, o 29 de marzo, cando 140 persoas deron positivo por coronavirus.
