Por incrible que poida parecer, a lista presentada por Integridad + Resolución no municipio de Monterroso ten moitos menos votos que as persoas que a conforman. Soamente tres apoios recibiu o proxecto encabezado por Manuel Ángel Branco, a pesar de que a candidatura estaba formada por 17 persoas, seis delas suplentes.
O cabeza de lista, Manuel Ángel Branco, explicou este mércores o motivo de que estas contas non saísen. "Custounos moito atopar candidatos de Monterroso", admitía, co cal moitas das persoas que compuñan a lista nin sequera estaban empadroadas no municipio. El mesmo, aínda que é de Monterroso, viviu moitos anos fóra e recoñece que non é coñecido. Aínda que indica que iso non debería ser un problema, "é un erro votar a persoa, e non a proposta, pero ninguén tivo interese en escoitarnos", indica.
A lista de I+R non foi, con todo, a menos votada porcentualmente polo electorado, cun 0,11 por cento. Converxencia 21, lista encabezada no municipio de Lugo por Xaime R. Requeixo, tivo o apoio do 0,07 por cento do electorado lucense, con 35 votos. Este avogado, secretario xeral da formación, non fixo campaña.
A lista de Compromiso por Galicia en Ribadeo obtivo 30 votos máis, 65, que corresponden ao 1,15 por cento do electorado. Neste caso, o seu cabeza de lista é ben coñecido no municipio. Jesús Pérez foi concelleiro co BNG nos anos 90, e cambiou varias veces de siglas. Este mes de xaneiro concorreu ás primarias co PSOE, que perdeu contra Marta Rey. Foi entón cando fixo unha lista para presentarse con CxG.
A candidatura de En Marea en Sarria, encabezada por Iván López, obtivo, pola súa banda, o 1,3 por cento do apoio dos votantes do municipio, un total de 139.
