O Presidente da Deputación de Lugo, José Tomé Roca, solicitou este venres unha revisión no sistema de financiamento local e defendeu os servizos públicos, o emprego e a mobilidade como "medidas esenciais" fronte ao reto demográfico.
Tomei expresouse así durante a súa intervención como relatora na mesa de traballo sobre o reto demográfico celebrada no marco da V Conferencia de Presidencias de Deputacións, Cabildos e Consellos Insulares de toda España que acolle a cidade de Valencia baixo a organización da Federación Española de Municipios e Provincias (FEMP) e da Fundación Democracia e Goberno Local.
O presidente do Goberno provincial subliñou que para responder ao reto demográfico "hai que actuar en, polo menos, tres eixos fundamentais: os servizos públicos, o emprego e a mobilidade, ademais da conectividad do territorio", deseñando "políticas públicas transversais para favorecer o equilibrio territorial".
Ao fío disto, demandou unha revisión e mellora do financiamento local que garanta "a suficiencia económica das entidades municipais para atender as necesidades da cidadanía e, desta forma, loitar contra o despoboamento".
Máis pormenorizadamente e en canto aos servizos públicos, defendeu que "os elementos básicos para que as persoas poidan desenvolver o seu proxecto de vida son a sanidade, a educación, os servizos sociais e a atención aos maiores". "Sen escolas infantís, servizos médicos, residencias e centros de día resulta imposible fixar poboación no rural", asegurou.
Nesta liña argumentou que "se non se garante a universalidade e gratuidade dos servizos públicos para toda a cidadanía, incúmprese o mandato constitucional e plántase a semente do abandono no rural".
En canto ao emprego, incidiu na importancia de apostar "polo emprego feminino e xuvenil" e en apostar "por políticas de emprego que conjuguen as posibilidades das novas tecnoloxías e o I+D universitario co acervo de saberes tradicionais que acumula o rural", así como polo medio ambiente, "convertido no mellor aliado dun turismo de calidade, non masificado, que valora as experiencias e tende a repetir a visita".
Respecto ao terceiro eixo, ao da mobilidade, instou a garantir "a accesibilidade do territorio", que recordou ademais que as deputacións "soportan un custo económico de amplas redes de estradas, que no caso da provincia supera os 4.000 quilómetros, a máis extensa dunha Deputación en España".
O Presidente abordou o Plan Único de Cooperación cos concellos da Deputación lucense co que se garante "unha achega de fondos distribuídos con criterios públicos e obxectivos, e que, respectando a autonomía local, axúdanlles a sacar adiante obras e servizos, moitos deles esenciais.
Para rematar, Tomei Roca explicou algunhas das medidas da Deputación para facer fronte ao reto demográfico como son centros públicos de atención aos maiores en marcha no rural, "un modelo asistencial que garante a atención próxima e de calidade, ademais crear un emprego sostible".
A Deputación dispón actualmente de siete residencias públicas, con máis de 200 usuarios e uns 180 traballadores, dos que o 95% son mulleres. Este ano abrirá outros dous centros máis, ademais de seguir traballando noutros nove proxectos.
