Isabel Rodríguez, ata agora tenente de alcalde do Concello de Viveiro, é a persoa elixida para ocupar o cargo de subdelegada do Goberno en Lugo, co que se converte na primeira muller en asumir esa responsabilidade nesta provincia. A propia Isabel Rodríguez confirmou que xa recibiu notificación do seu nomeamento, de modo que terá que presentar a súa renuncia como concelleira de Viveiro no próximo pleno.
Médico de profesión, Isabel Rodríguez, de 62 anos, tamén é secretaria de Sanidade do PSdeG de Lugo.
Antes de que se producise este nomeamento, a alcaldesa de Lugo, Lara Méndez, dixo que sería "unha boa aposta" que, polo menos nesta provincia, se poña á fronte da institución por primeira vez unha muller.
"Que haxa unha muller nos órganos directivos para min sempre é unha boa aposta e un bo sinal", dixo Lara Méndez.
