Axentes da Garda Civil sorprenderon en Lugo dous condutores ebrios cando realizaban desprazamentos non autorizados cos seus vehículos durante o estado de alarma.
O primeiro foi localizado o 11 de abril sobre as 20.30 horas, cando unha patrulla da Garda Civil identificou na estrada LU-120, no municipio de Cospeito, un condutor que estaba a realizar un desprazamento non autorizado.
Ademais, ao advertir que presentaba síntomas evidentes de acharse baixo a influencia de bebidas alcohólicas, foi sometido ao correspondente control, no que deu unha taxa de 0,58 miligramos por litro de aire expirado, máis do dobre do máximo permitido pola lei.
Ese mesmo día, sobre as 23.00 horas, outra patrulla do instituto armado observou que un condutor, ao decatarse da súa presenza, estacionou o seu vehículo nas inmediacións da N-VI no municipio de Lugo. Ao ser preguntado polo motivo do seu desprazamento, respondeulles que "foi a dar un paseo, xa que pode ir onde queira".
Ao comprobar que presentaba síntomas de ir bebido, foi sometido ao correspondente control e deu unha taxa de 0,49 miligramos de alcol por litro de aire expirado, o dobre do permitido.
En ambos os casos, os condutores foron denunciados por conducir cunha taxa de alcol superior á permitida e por saltarse o estado de alarma.
