A seis meses das eleccións municipais os movementos políticos empezan a intensificarse e parece que Taboada podería sumarse á lista de concellos que apostan por formar candidaturas independentes que funcionen baixo as mesmas siglas. É máis, a iniciativa podería supor o regreso á política do exrexedor popular José Jesús Ramos Ledo.
O movemento para crear unha coalición de listas independentes en varios municipios da provincia co obxectivo de optar a representación na Deputación de Lugo e facer de chave entre os partidos tradicionais non é nova nin secreta. De feito, en varias ocasións transcenderon comidas e reunións nas que participaron o rexedor chantadés, Manuel Lorenzo Varela; o seu homólogo de Becerreá, Manuel Martínez; e o exalcalde de Monterroso, Jesús Otero, líderes do movemento.
Tras un deses encontros celebrado o pasado mes de xuño nunha adega da ribeira chantadesa, Manuel Lorenzo Varela apuntaba que as conversacións estaban aínda nunha fase inicial pero que se seguían prosperando ao mesmo ritmo pronto se podería falar de novas incorporacións ao proxecto.
No partido xudicial de Chantada a proposta necesitaba polo menos dun concello máis para ser viable e, segundo as fontes consultadas, as conversacións están a intensificarse para que esa incorporación sexa a de Taboada e que un peso pesado da política como o exalcalde José Ramos Ledo a lidere.
Fontes moi próximas ao propio Ramos recoñecían este martes que había algunha proposta sobre a mesa, sen especificar cal, pero tamén aseguraban que a decisión non estaba tomada porque o exrexedor xa se afixo a estar lonxe da primeira liña do mundo da política e sentíase cómodo así. "Pero hai moito interese e presión por que regrese", insistían esas mesmas fontes.
TRAXECTORIA. Nacido en 1944, Ramos Ledo presentouse ás eleccións en 1983 da man de Coalición Galega e fíxose coa alcaldía de Taboada en 1987 baixo as siglas de Alianza Popular, cargo que renovou sistematicamente nas filas do PP ata o ano 2009.
Nesa data deixou o posto para facerse cargo da xefatura territorial de Educación (durante 32 anos foi director do colexio de Taboada) ata 2014, cando se xubilou.
