Os hostaleiros lucenses promocionarán os produtos gastronómicos da provincia na 73ª edición da Volta Ciclista a España por sétimo ano consecutivo, a través da colaboración entre Turismo de Galicia e a APEHL, Asociación Provincial de Empresarios de Hostalería de Lugo.
O programa de promoción foi presentado este luns na Oficina de Turismo da Xunta en Lugo, coa presenza da directora xeral de Turismo, Nava Castro; a conselleira de Medio Rural, Ángeles Vázquez; o presidente da APEHL, Cheché Real; e o director da Volta, Javier Guillén.
En concreto, ao comezo das 21 etapas estarán presentes un ano máis na caseta de E para comer, Lugo os D.O.P. Queixo Arzúa-Ulloa e Queixo do Cebreiro, o D.O. Ribeira Sacra e as I.X.P. Tenreira Galega, Pataca de Galicia, Castaña de Galicia, Grelos de Galicia, Mel de Galicia, Faba de Lourenzá e Pemento de Mougán.
A estas marcas únense outras dúas na actual edición da Volta: a I.X.P. Vaca e Boi de Galicia e o selo Galega 100%, que engloba aos produtos lácteos elaborados na comunidade galega.
Así mesmo, segundo confirmou o presidente dos hostaleiros lucenses, sete cociñeiros da comarca da Mariña estarán presentes en todas as etapas para elaborar preparacións a partir dos produtos seleccionados.
A conselleira de Medio Rural incidiu na importancia de axuntar "territorio, gastronomía e deporte" á hora de promocionar o turismo en Galicia.
Estarán presentes as D.O.P. Queixo Arzúa-Ulloa e Queixo do Cebreiro, a D.O. Ribeira Sacra e as I.X.P. Tenreira Galega, Pataca de Galicia, Castaña de Galicia, Grelos de Galicia, Mel de Galicia, Faba de Lourenzá e Pemento de Mougán
"O visitante vén pola paisaxe e tamén polo bo comer, pero agora estase apostando cada vez máis polo turismo deportivo", indicou Vázquez.
Pola súa banda, o director da Volta cualificou o evento que organiza como "a feira itinerante máis grande de toda España".
"Os produtos de Lugo atravesarán 3.500 quilómetros de toda España e serán vistos por máis de 400 millóns de espectadores de 190 países do mundo", destacou Guillén. De feito, nesta edición haberá etapas en Andalucía, Murcia, Castela-A Mancha, Castela e León, Asturias, Cantabria, Euskadi, Aragón, Cataluña e Andorra, ademais de dous percorridos por terras galegas.
A primeira etapa que pasa por territorio galaico celebrarase o día 5 de setembro, con saída desde a localidade zamorana de Mombuey e chegada ao municipio ourensán de Luintra, situado na comarca da Ribeira Sacra. Trátase da etapa máis longa de toda a carreira, cun perfil accidentado e varios portos de segunda e terceira categoría.
Un día máis tarde, o 6 de setembro, terá lugar a segunda etapa galega, con inicio en Mondoñedo e final no faro de Estaca de Bares, no municipio coruñés de Mañón.
"Somos moito máis que un evento deportivo; somos unha plataforma de comunicación tanto por televisión como a pé de rúa", sinalou Guillén.
