O Ministerio de Fomento confirmou este martes que ampliará a 5,54 millóns de euros o orzamento destinado a arranxar estradas da provincia de Lugo que son da súa titularidade e que se atopan nun estado moi deficiente.
As vías beneficiadas por este investimento serán a N-540, que une Lugo con Ourense; a N-547, que vai de Lugo a Santiago; a N-642, entre Barreiros e San Cibrao, e zonas puntuais da A-6.
O Ministerio de Fomento licitou en xaneiro pasado o arranxo da estrada de Barreiros a San Cibrao por 2,92 millóns de euros. No mes de abril, e ante a onda de críticas que suscita o mal estado das vías que unen a cidade de Lugo coas de Ourense e Santiago, aprobou un investimento de 2,82 millóns para obras de reparación do firme da N-540 e da N-547.
Esta última partida é a que agora se amplía a 5,54 millóns de euros, unha vez constatado que o orzamento inicial é claramente insuficiente para solucionar as deficiencias que presentan estas dúas estradas.
No entanto, o Ministerio de Fomento anuncia que unha parte destes fondos destinarase tamén a arranxos na citada estrada da Mariña e na autovía do Noroeste (A-6).
A intención de Fomento é continuar durante os dous próximos meses os traballos iniciados nestas vías, ampliando as obras a outros tramos. O obxectivo do ministerio é cubrir na medida do posible as fochancas existentes, aínda que non se expón de momento unha renovación total do firme de ningunha das vías da súa titularidade. Fomento avanza que incidirá especialmente na variante de Chantada da N-540 e nalgúns tramos moi deficientes da N-547.
