A Asociación de Criadores de Raza Rubia Galega (Acruga) comunicou os gañadores dos concursos de fotografía, debuxo e redacción que se convocaron por mor da celebración dos 50 anos do organismo. José Antonio Ferreiros Palacios logrou o primeiro premio no certame de fotos, mentres que os concursos infantís terminaron con Omar Meiriño (debuxo) e José Antonio Ferreiro (redacción) como vencedores.
O concurso con maior participación foi o de fotografía, ao que podían concorrer gandeiros de Acruga de toda España. O vencedor foi José Antonio Ferreiros, que se alzou co primeiro premio, dotado con 400 euros. A segunda clasificada foi Montserrat Fernández (300 euros), mentres que Gandería Santalla fíxose coa terceira praza e, con ela, 200 euros.
As tres fotografías que coparon o podio exhibiranse xunto ás dos doce finalistas, e tamén as máis de 190 imaxes que se presentaron ao concurso. O xurado do certame estivo composto por Modesto Arias (secretario de Acruga), Sergio Aller (Ancaria Comunicación) e María de la Torre (Diálogos Comunicación).
No que aos concursos infantís se refire, ambos os certames repartían para os gañadores vales valorados en 150 euros (primeiro premio),100 (segundo) e 75 (terceiro).
Omar Meiriño, do colexio Eloísa Rivadulla (Chantada), conseguiu ser o mellor valorado no concurso de debuxo. Adrián Maceda, do Frei Luis de Granada (Sarria), foi segundo, mentres que a terceira posición conseguiuna María Otero Otero que estuda tamén no Eloísa Rivadulla.
Os xuíces que fallaron este premio foron Modesto Arias, María de la Torre e a deseñadora Mónica Pereira.
O gañador do primeiro premio no concurso de redacción conseguiuno José Antonio Ferreiro Núñez, do CEIP San Miguel de Paradela, grazas ao seu texto A vaca Gabriela. David Dorado (Maristas) terminou segundo e Ariadna Sestelo (Infante Felipe de Borbón, Salvaterra do Miño), terceira.
O xurado estivo composto por Sergio Aller, María José Rodríguez (directora técnica de Acruga) e Miguel Rodríguez (administrativo de Acruga).
