Os indicadores da Asociación de Criadores de Raza Rubia Galega (Acruga) ao longo de 2020 desprenden un balance malo, do mesmo xeito que noutros sectores, pero chaman a atención varios datos positivos que invitan a pensar nunha boa recuperación do sector para 2021. Neste ámbito destaca o incremento do número de animais por explotación -que pasou de 20 exemplares por gandería a 23- e o mantemento da ganancia medida diaria dos exemplares sacrificados.
Todo iso tradúcese nun bo comportamento da raza no mercado, con bos resultados na comercialización de tenreiros, á marxe do descenso da demanda de carne acusado pola pandemia.
Aínda que neste exercicio déronse de baixa varias explotacións, a maioría eran pequenas, mantéñense as máis grandes e profesionalizadas.
A ganancia media, os pesos ao nacemento e os do destete mantivéronse en 2020, algo moi positivo, xa que unha das cuestións máis valoradas desta raza é a alta capacidade produtiva das súas canles, que se miden na denominada ganancia media diaria.
Os animais certificados coa marca Tenreira Galega Suprema Carne de Rubia Galega pasou de 7.217 canles a case 8.000 o ano pasado, o que demostra un bo resultado na comercialización de tenreiros. O prezo medio en poxas foi de 2.150 euros, en niveis de 2018, pero por baixo dos 2.360 euros de 2019.
Na asemblea de Acruga falouse de proxectos de futuro como a posibilidade de sexar seme de touro a partir de xaneiro de 2022, un proxecto que se desenvolverá en Xenética Fontao. Outra das accións que beneficiará á raza rubia galega é contar co logo Autóctono 100%, que lle permitirá obter unha maior diferenciación para a súa carne.